მშობიარობის შემდგომი ვარჯიშები, რომლებიც დაგეხმარებათ სწრაფად ჩადგეთ ფორმაში

მშობიარობის შემდგომი ვარჯიშები, რომლებიც დაგეხმარებათ სწრაფად ჩადგეთ ფორმაში
გთავაზობთ ვარჯიშების კომპლექსს, რომელიც საშუალებას მოგცემთ, ლოგინობის ხანის პირველი დღეებიდანვე იზრუნოთ საკუთარ გარეგნობაზე.

მშობიარობიდან 48 საათის შემდეგ

მენჯის რხევები
ეს ვარჯიში ხელს უწყობს მუცლის კუნთების შეკუმშვას, აგრეთვე შეგიმსუბუქებთ მშობიარობის შემდგომ ზურგის ტკივილს, რომელიც საშვილოსნოს შეკუშვით არის გამოწვეული. დაწექით ზურგზე, მიტყუპებული ფეხები მოხარეთ მუხლებში, ამოისუნთქეთ, შეზნიქეთ მუცელი, დაჭიმეთ დუნდულები ისე, რომ ერთმანეთს მიუახლოვდეს. მენჯი ასწიეთ და ზურგით მიეკარით საწოლს. გაჩერდით ასე და დათვალეთ ოთხამდე. დაეშვით.

ვარჯიში ტერფებისთვის
ეს ვარჯიში აუმჯობესებს სისხლის მიმოქცევას ქვედა კიდურებში, რაც განსაკუთრებით მნიშვნელოვანია მათთვის, ვინც იძულებულია, დიდხანს იწვეს. მოხერხებულად დაწექით, გამართეთ ფეხები და დააშორიშორეთ ქუსლები დაახლოებით 30 სმ - ით. ამის შემდეგ ტერფები მოხარეთ და სწრაფად ამოძრავეთ ზევით - ქვევით. ვარჯიში უნდა გაგრძელდეს არანაკლებ 30 წამისა. როდესაც ვაჯიშს დაასრულებთ, შეასრულეთ წრიული მოძრაობა ორივე ტერფით. გაიმეორეთ რვაჯერ.

წოლითი ვარჯიშები
დაწექით გვერდზე, ფეხები მუხლებში მოხარეთ. ამოისუნთქეთ და მუცელი შეზნიქეთ, ხოლო ზურგი ამოზნიქეთ. ამის შემდეგ მოეშვით და გასწორდით. თავდაპირველად ვარჯიში ექვსჯერ გაიმეორეთ, მერე და მერე - უფრო და უფრო მეტჯერ, ვიდრე ოცამდე არ ახვალთ. ეს მოძრაობები ზურგის ტკივილს შეგიმსუბუქებთ.

მენჯის ფუძის ძირითადი ვარჯიში
ეს მეტად მნიშვნელოვანი ვარჯიშია - ამაგრებს მენჯის ფუძეს, აუმჯობესებს სისხლის მიმოქცევას მის კუნთებში და აქრობს ტკივილს, აგრეთვე ხელს უწყობს მშობიარობის შემდგომი შეშუპებისა და სისხლნაჟღენთების გაწოვას. დაწექით ზურგზე, ფეხები მოხარეთ მუხლებში, შეიზიდეთ საშოს კუნთები შიგნით და ზევით ისე, თითქოს რამის, მაგალითად, ტამპონის შეკავება გსურთ. ცოტა ხანს ასე გაჩერდით და მოეშვით. გაიმეორეთ იგივე სწრაფად ისე, რომ კუნთები დაჭიმული შეინარჩუნოთ 2 -3 წამის განმავლობაში. ეცადეთ, ეს ვარჯიში შეინარჩუნოთ 2 - 3 წამის განმავლობაში. ეცადეთ, ეს ვარჯიში აკეთოთ მთელი დღის განმავლობაში, 15 წუთში ერთხელ.

მუცლის ვარჯიში
ეს ვარჯიში კუნთების განსამტკიცებლად არის განკუთვნილი. დაწექით ზურგზე, ფეხები მუხლებში მოხარეთ, ამოუსუნთქეთ და მენჯი ასწიეთ, მუცელი შეიზნიქეთ, დუნდულები დაჭიმეთ. ნიკაპი გულმკერდს მიაბჯინეთ, მხრები და თავი წამოსწიეთ. ასე გაჩერდით 4 წამი. მერე ნელა დაეშვით. ვარჯიში თავდაპირველად გაიმეორეთ ექვსჯერ, მერე და მერე - უფრო და უფრო მეტჯერ, ვიდრე 20 - მდე არ ახვალთ.

დასვენების პოზა
ამის შემდეგ შეგიძლიათ დაისვენოთ. დაწექით მუცელზე და მთელ სიგრძეზე გაიჭიმეთ. მოხერხებულად რომ მოეწყოთ, საჭიროა ორი ბალიში: ერთი თავისა და მხრების ქვეშ ამოიდეთ, მეორე -მუცელქვეშ. ასე დარჩით 15 - 30 წთ. თუ გაწუხებთ წელის ტკივილი, გაქვთ ბუასილი, ტკივილს შეასუსტებთ, თუ მუცელზე მწოლიარე დუნდულა კუნთებს რიტმულად დაჭიმავთ და მოადუნებთ.
სტატიის ავტორი: თამარ მამაცაშვილი
სტატიის წყარო:იცნობდე რათა დაამარცხო