ყველაზე ეფექტური 5-15წთ-იანი ვარჯიშები

კარგი ამბავი გვაქვს მათთვის, ვისაც საუკეთესო ფორმაში სურს ჩადგომა, მაგრამ ვარჯიშისთვის დრო არ აქვს: ივარჯიშეთ ცოტა ხნის განმავლობაში მაქსიმალური დატვირთვით. არსებობს მაღალეფექტური და მარტივი სავარჯიშოები, რომლებიც მეტი ცხიმის დაწვაში დაგეხმარებათ.

იმისათვის, რომ მაქსიმალურად ეფექტური გახადოთ ხანმოკლე ვარჯიშები, მიჰყევით ამ რჩევებს:

1. შეარჩიეთ ისეთი ვარჯიშები, რომლებიც ასტიმულირებს კუნთების უმეტესობას;
2. გულისცემათა სიხშირე იმ დონემდე აუშვით, რომ ლაპარაკი ვეღარ შეძლოთ; შემდეგ კი ისევ თქვენს ნორმამდე დაიყვანეთ და ისე დაასრულეთ ვარჯიში.
3. ისეთი ვარჯიშები მოირგეთ, რომლებიც გაჭიმვებს, სიმძიმის აწევასა და გულ- სისხლძარღვთა სისტემის სტიმულაციას მოიცავს;
4. ნუ ივარჯიშებთ სხეულის გამოფიტვამდე, თორემ ამით გამოიწვევთ სტრესულ მდგომარეობას;

3- 5 წთ- იანი გახურება
დაიწყეთ სხეულის გახურება სახსრების ნებისმიერი მიმართულებით ამოძრავებით. მაგ.: წელის ტრიალი, ხელებით ,,მაკრატელი”, მუხლის ლიფტინგი, გაშლილი ფეხების ქნევა, მხრების როტაცია და ა.შ. ამ მოძრაობებს დინამიური ,,სტრეჩინგი” ჰქვია და სხეულს ინტენსიური ფიზიკური დატვირთვისთვის ამზადებს.

15 წთ-იანი ვარჯიში
დინამიური გახურების შემდეგ, საუკეთესო ვარჯიშს კიბეზე ასვლა/ჩამოსვლა წარმოადგენს. თავდაპირველად, ადით კიბეზე რამდენიმეჯერ, შემდეგ კი გამოტოვეთ თითო საფეხური და დარწმუნდით, რომ ყველა სახსარი აქტიურად მოძრაობს. თუკი გულისცემა ზედმეტად გაგიხშირდებათ, შეისვენეთ 30 წამით, ჩაისუნთქეთ ღრმად, ამოისუნთქეთ და განაგრძეთ ვარჯიში.

შეგიძლიათ, თანდათან გაზარდოთ დისტანცია საფეხურებს შორის. ეს თქვენს შესაძლებლობაზეა დამოკიდებული. ივარჯიშეთ კიბეზე 15 წუთის განმავლობაში და თავს ისე იგრძნობთ, თითქოს სხვადასხვა ტრენაჟორისთვის საათზე მეტი დაგეთმოთ.

ალტერნატიული გზაა თოკზე ხტომა, ( საუკეთესო ვარიანტია 100 ახტომა) შემდეგ კი იოგას რამდენიმე პოზის გაკეთება.