რულეტი "ბაუნტი" (ცხობის გარეშე): მარტივი და გემრიელი დესერტი

ეს არის განსაკუთრებით გემრიელი და მარტივად მოსამზადებელი ნამცხვარი, რომელსაც არ სჭირდება გამოცხობა და თითქმის შეუძლებელია არ გამოგივიდეთ.

მასალად საჭიროა:

ორცხობილა 200 გ. ("იუბილეინოე" ან მსგავსი)

წყალი 100 მლ.

კაკაო 3 ს.კ.

10 ს.კ. ქოქოსის ფანტელი

80 გ. დარბილებული კარაქი

60 გ. შაქრის პუდრა

თუ გამოვიყენებთ სამარხვო ორცხობილას და მცენარეულ კარაქს, ნამცხვარიც სამარხვო გამოგვივა.


მომზადება:

ორცხობილას დავფხვნით ბლენდერში ისე, რომ ფქვილივით მასა მივიღოთ. დავამატებთ წყალს და კარგად ავურევთ. დავაცრით კაკაოს და შევკრავთ გუნდად.






ქოქოსის, შაქრის პუდრასა და კარაქისგანაც ასევე გავაკეთოთ გუნდა.

კაკაოსფერი გუნდა გავაბრტყელოთ 2-3 მმ სისქის ოთხკუთხედად საკონდიტრო ცელოფანზე.

ზემოდან გავშალოთ ქოქოსის გუნდა და გადავახვიოთ რულეტი.






შევდოთ მაცივარში. როცა კარგად გაცივდება დავჭრათ და ... მივირთვათ!