ღრძილებიდან სისხლდენის დროს სამკურნალო ხალხური რეცეპტი.

ღრძილებიდან სისხლდენის დროს სამკურნალო ხალხური რეცეპტი.
მაქვს ღრძილების ქრონიკული ანთება. პერიოდულად ღრძილები მისივდება და მტკივა ხოლმე. ნათესავმა მასწავლა შემდეგი საშუალება :
გთავაზობთ ღრძლებიდან სისხლდენის დროს სამკურნალო ხალხურ რეცეპტს:

ინგრედიენტები:

  • 2 წილი დაქუცმაცებული მუხის ქერქი
  • 1 წილი ცაცხვის ყვავილი

მომზადების და გამოყენების წესი:

2 წილი დაქუცმაცებული მუხის ქერქი და 1 წილი ცაცხვის ყვავილი შეურიეთ ერთმანეთს. 1ჩ/კ ნარევს დაასხით ქაფქაფა, მუღარე წყალი, გააჩერეთ ცოტა ხანს და გაწურეთ. დღეში რამდენჯერმე გამოივლეთ პირში თბილი ნაყენი, 2 კვირის განავლობაში. 3 დღის შესვენების შემდეგ კურსი გაიმეორეთ.

ექიმის კომენტარი:

მუხის ქერქს აქვს ანტიანთებითი, დაჩირქების საწინააღმდეგო და ლორწოვანის დამცავი თვისებები. მას იყენებენ პირის ღრუსა და ხახა-სასის ლორწოვანი გარსის სხვადასხვაგვარი დაავადების დროს ( სტომატიტი, ფარინგიტი, გინგივიტი- ღრძილების ანთება და სხვა. )
მცენარე რეკომენდებულია, აგრეთვე, ტერფების ჭარბი ოფლიანობის, ჭარბი მენსტრუაციის, კუჭ-ნაწლავის ტრაქტიდან სისხლდენის დროს, საშარდე გზების ანთებების, ენტეროკოლიტების (ნაწლავების ანთების) შემთხვევაში.
ცაცხვის ყვავილი შეიცავს ფლავონოიდებს, საპონინებს,ასკორბინის მჟავას და კაროტინს, ეთეროვან ზეთს და სხვა ბიოაქტიურ ნივთიერებებს. მას აქვს ანტიმიკრობული და ანტიანთებითი თვისებები. ამიტომ იყენებენ პირში გამოსავლებად პირის ღრუსა და ხახის ანთებითი დაავადებების, ანგინების დროს. საფენების სახით ცაცხვის ყვავილების ნახარში გამოიყენება დამწვრობების, წყლულების, ჰემოროიდული კვანძების ანთების, სახსრების რევმატიული და პოდაგრული ტკივილების დროს. ცაცხვის ჩაის იყენებენ, აგრეთვე, როგორც სიცხის დამწევ, ოფლმდენ საშუალებას გაცივების, ბრონქიტის, ანგინის დროს.
სტატიის წყარო:თამარ მამაცაშვილის წიგნი კარაბადინი